ماهي اجراءات نقل ملكية السيارة

ماهي اجراءات نقل ملكية السيارة

الجواب

هو

اول الاجراءات كانت بالطبع فى الشهر العقارى لتسجيل عقد بيع

الاوراق المطلوبه 

كل توكيلات العربيه وتكون مرتبها بترتيب عملها وياريت تكون مدبسها

صور بطاقتك 3 صور احتياطى ( لو كنت انت الشارى والبايع لكن لو البائع الاصلى موجود تصور بطاقته هو كمان ) وصور كل التوكيلات صورتين 

هتدخل على مكتب بيع النماذج تشترى عقد بيع وتملى البيانات وبعدين تدخل على موظف تسجيل العقود

هياخد منك كل الورق مع صورتين البطاقه وصوره من التوكيلات وهيملى البيانات وبعدين يبعتك لموظفه تقدير الرسوم

هتروح بالعقد تقدر الرسوم وبعدين تروح تدفع فى الخزنه

بعد ما تدفع هترجع بالوصل والعقد للموظف بتاع التسجيل بخلص لك العقد وتروح تختمه من مكتب مدير الشهر العقارى

ارجع بالعقد للموظف بتاع التسجيل للتأكد ان مفيش اى ختم ناقص لان اللى بيختم بيكون بيرغى او بيفطر وبينسى ساعات اختام ولو قالك تمام كدا خلاص

قبل ما تمشى اتاكد انك اخدت كل التوكيلات من الموظف واوعى تنسى اى ورق عنده هو مش هياخد غير بس صور ومفيش اى اصول هياخدها

اجراءات التسجيل بسيطه ومش بتاخد وقت المهم تدور على شهر عقارى يكون مفيش عليه ضغط قوى

ملحوظه : لو مش انت اللى هتعمل الاجراءات فى المرور وهتوكل حد وانت واقف اعمل توكيل اداره من العقد اللى لسه مسجله للشخص اللى هيروح المرور علشان محدش يضايقه هناك وهو بيكون نفس خطوات العقد بالظبط وبيتكلف 10 جنيه

------

مشوار المرور لنقل الملكيه 

قبل ما تروح المرور صور رخصتك وبطاقتك ورخصه العربيه لو معاك توكيل اداره صور بطاقتك والتوكيل واشترى ملف فاضى من برا حط فيه الهيصه دى كلها

( نصيحه خد معاك ظرف كبير او اى حاجه مقفوله تلم فيها كل صور الورق دى علشان تكون سهله وسريعه تطلعها وانت قصاد الشباك صدقنى هتدعيلى لما تعرف ليه بعد كدا )

اول حاجه ادخل شباك النماذج قوله عايز نموذج نقل ملكيه بعدد السنين اللى انت عايز ترخص بيها ( سواء كان سنه او 3 سنين )

وبعدين خد النموذج ومتملاش فيه اى بيانات غير بس فى نموذج نقل الملكيه نفسه اكتب اسم صاحب الرخصه الجديده والعنوان ورقم التليفون بس

روح اشترى طفايه وقول للراجل فى الشباك متكتبش رقم العربيه على الطفايه علشان بنقل ملكيه وخليه يكتبلك رقم الموتور والشاسيه على الطفايه بس وهياخد منك ورقه حمراء بتاعت الطفايه فى الورق اللى اشتريته يختمهالك ( الطفايه ب 121 جنيه )

ادخل مكتب التامين الاجبارى قوله عايز تامين سنه او 3 سنين حسب ما انت هترخص هيديك اصل وصوره الاصل فى الملف والصوره خليها معاك

خد عربيتك وادخل الفحص وادى للمهندس ورق الفحص ( ورقه مكتوب عليها نموذج فحص وورقه بتاعت نموذج البيئه )

هياخد البصمتين وهيخلصلك الورقه 

( فى عربيات معينه لازم تعمل عنها استعلام فى المباحث وده حسب اوامر الوزاره ومنهم اللانسر )

لو قالك اعمل استعلام هتاخد نموذج الفحص وتطلع مكتب المباحث تقدمه وهياخد منك بطاقتك والرخصه وبعدين يخلص ويديلك الورق تنزل تانى للفحص يديك الموافقه

كدا انت جاهز لشباك نقل الملكيه

روح بقا على عربيتك فك النمر وخدها معاك وادخل

وانت داخل عدى على مكتب تصوير المستندات اشترى 4 استعجالات هيطلبهم منك جوا

خد بالك حتى الان معاك ملف اللى كان فاضى بقا فيه كل النماذج اللى ادهالك بتاع الشباك ومعاها الدمغه بتاعتها اللى ادهالك برده

ومعاك الظرف اللى فيه صور بطاقتك والرخصه وتوكيل الاداره ان وجد 

ملحوظه مهمه جدا : ( لو كنت موكل عن صاحب الرخصه لازم يكون معاك اصل بطاقه اللى الرخصه هتكون بأسمه )

توكل على الله وخد نفس عميق وادخل فى طابور شباك نقل الملكيه وخليك صبور واتعرف على الناس اللى فى الطابور صدقنى الموضوع مسلى انا يومها اتعرفت على دكتور ومدرس وطالب هندسه :):)

وصلت للموظف والحمد لله اظرفه الملف بكل ما فيه وخلى النمر فى ايدك دلوقتى

هيقعد يملا البيانات وخلافه وهياخد وقت شويتين وبعد ما يخلص ان كنت سمعت كلامى مش هيطلب منك حاجه تانى

طبعا هتلاقيه قالك روح صورلى اى حاجه وانت جاهز معاك كل الصور لو مصورتش بقا هتخرج من الطابور تصور وترجع تقف تانى فى الطابور علشان كدا قولتلك فى الاول كل ورقه صورها 3 نسخ وخليها معاك عدا النماذج

بعد ما يخلص خالص ويقولك صباح الفل وخلافها هيطبعلك ورقه فيها تقدير الرسوم وهياخد منك النمر علشان تروح تدفع فى الخزينه الرسوم المستحقه وربنا يكفيك شر طابور الخزنه

دفعت فى الخزنه وخدت الوصل ولسه عايش هترجع تدى اصل الوصل لشباك نقل الملكيه بقا من جنب الطابور كدا وهيديك ورقه فيها بيانات عربيتك الجديده يقولك صورها صوره ويقولك هات 4 استعجلات طبعا انت جبتهم اساسا هتديهومله

هتصور الورقه وترجعها له وتخرج بقا تستنى عند شباك تسليم الرخص

خليك صاحى عند الشباك ملفك هيتراجع جوا الاول لو فى اى مشاكل هيندهلك تانى يقولك تعالى جوا فى مشكله

لو براءه هينده عليك تستلم رخصتك بأصل بطاقه اللى الرخصه بأسمه علشان يتأكد ان انت صاحب الرخصه وبعدين تاخدها وتدخل بيها مكتب استلام اللوحات ومبروك عليك

----

شويه حاجات تخلى بالك منها

مشكله قابلتنى ان عربيتى فيرانى واللى ينطص فى نظره :) اللى كتبها فى الرخصه الاولى كان كاتبها فضى فكنت لازم اروح اعمل مطابقه للون من المرور الاصلى

لو الظابط قالك عايز مطابقه لون او اى مطابقه هيكتبلك جواب على ظهر ورقه الفحص تروح بيه المرور الاصلى

خلى بالك قوى من الحته دى

اوعى تاخد الورقه وتمشى لازم تاخد الورقه وتدخل لمدير الوحده الاول يختمهالك لو روحت بيها المرور الاصلى كدا هيقولك العب بعيد وهتعيد الفيلم من اوله ( هيختمها ختم فى الظهر وختم على البصمه - وركز قوى مع الختم يكون على البصمه )

هتروح بيها المرور الاصلى لمهندس الفحص يقشر عليها وتطلع الارشيف تجيب ملف العربيه تاخد منه التأكيد اللى عايزه ويختمهالك المرور الاصلى برده انها تمام

وترجع بيها للمرور الجديد يخلصلك الباقى

----

برده ملحوظه تانيه لو الرخصه اللى معاك لسه فيها مده 

قول للراجل بتاع نقل الملكيه على الشباك عايز اكمل على اللى موجود فى الرخصه يعنى لو فيها 6 شهور قوله اكمل سنتين على ال 6 دول لو فيها سنتين قوله اكمل سنه كدا يعنى

هتوفر على نفسك ثمن ضرببه المده دى الا لو كان فيها مثلا شهرين خلاص جدد 3 سنين عليهم